2015 оны 10-р сарын дунд үе Төрсөн Өдрийн Хүлээлт

         Төрсөн өдөр нь 12-р сарын 04-нд болох өдрийг тэсэн ядан хүлээж байгаа 3-н настай охин ааваасаа хэзээ миний төрсөн өдөр болох билээ, та надад ийм юм тийм юм авч өгнө шүү за гээд л асууж шалж гарна даа.

-Ааваа ааваа миний төрсөн өдөр яг хэзээ болох билээ?
-12р сарын 04-нд болноо миний охин,
-Аан тэр чинь 2 хоногийн дараа гэсэн үг тээ?
-Хэхэ үгүйдээ миний охин 12-р сарын ДӨРВӨНД шүү дээ, арай болоогүй байна,
-Тэгвэл тэр чинь ааваа ДӨРВӨН гэдэг чинь 4 хоногийн дараа гэсэн үг юм уу?
-Хэхэ үгүй миний охин сар гарангийн хугацаа байна, тун удахгүй миний охины төрсөн өдөр болоод зөндөө их гоё бэлэгтэй болно за.
-Ааваа та миний төрсөн өдрөөр БАБУУЛАЙ авч өгөөрэй тэгвэл
-Бабуулай гэж юу байдаг юм бэ?
-Хммммм тэр чинь аарцтай зайрмаг шүү дээ, та чинь мэддэггүй юм уу? Бас цөцгийтэй.
-За за аав нь авч өгнөө охиндоо.
-Аавдаа хайртай шүү, хөөрхөн шүү миний аав...

Өнө-Үжингийн хөгжилтэй явдлуудаас-004

         Эхнэр маань усанд орж байхдаа намайг дуудаад нуруугаа үрүүлэхээр боллоо. Эхнэр дээрээ очоод нурууг нь үрж байхдаа: "Миний хань чинь сайхан амьтан шүү дээ" гээд үнсэхэд хажууд байсан охин маань: "Айн юу вэ ээж маань ямар амьтан байна уу айн?" гэж хэлээд хөх инээд хүргэв.

       Энэ өдөр ажилаа тарж ирэхдээ Бонжүр авсан байлаа. Хаалгаар орж ирэхэд надаас гоё юм авъч гэж хэлэхгүй намайг өөрөө ухамсраараа авсан гоё юмаа өгөх байхдаа гэж бодсон юм шиг урдуур хойгуур гүйгээд л, маргааш ямар хувцас өмсөхөө яриад л, сандал дээр гараад л, толины өмнө гараад л, чишкэнийхээ резнийг янзлуулаад л, маргааш плажныхаа дээр өмссөн цамцаа ангидаа очоод тайлна шүү за гээд л тэгээд гэнэт тэвчээр нь алдагдсан охин: "Ааваа та надад гоё юм авчирсан юм уу?" гэхэд нь аав нь авчирсан Бонжураа өгөхдөө: "За хүүхдүүдээ нүдээ аниарай" гэлээ. Хүсэлээ авсан юмандаа баярлаад явлаа. Харин охин нь уурлаад:"Гоё юм авна гэж байхад чинь ийм юм өгөөд байхдаа яадаг юм бэ, би ийм юм идэхгүй ээ"гэлээ. Юу авах ёстой байсан талаар аав нь асуухад: "Наадаг зурагтай бохь авмаар байна, Бабуулай авмаар байна" гээд байхаар нь төрсөн өдрөөр нь Бабуулай авч өгөхөөр тохиролцоод тайвширцгаалаа.

        Энэ үед бид 1-р хороололын цамба гарав худалдааны төвийн ар талын 14-р байранд амьдардаг байлаа. Амьдралын сайхан мөчүүд минь эхнэр 2 хүүхэдтэйгээ элэг бүтэн хамтдаа байх тэр үе минь билээ. Хөгтэй явдлуудаар дүүрэн хүүхэд бага насны хайр хүргэм сайхан дурсамжуудыг чинь аав ээж хоёр нь тэмдэглэсээр байна хайрт үрс минь. 

2015.10.26-ны өдөр

        Өнөөдөр ажилаа тараад гэртээ ирлээ. Өнөхүсэл ээжтэйгээ хамт хичээлээ давтаж дуусаад бид 3 нуугдаж тоголохлоор боллоо. Алга тэнгэрээ үзээд би 2 хүүхдээ олохоор боллоо. 10 хүртэл тоолоод "Болсон уу?" гэхэд "Болоогүй ээ" гэлээ. Өнө-Үжин том өрөөний хөшигний ард нуугдсан байсаныг би мэдсэн учираас дөхөж очоод гижигдлээ, хэхэ, бас дахин гижигдлээ. За түүнийг олсон чинь "Ямар хурдан олдог юм бэ" гэж уураллаа. Өнөхүсэл харин жижиг өрөөний ширээн доороос олоход нь "Намайг олохгүй байх ёстой байсан шүү дээ" гэж бас л гоношигонолоо. 2 дахь удаагаа харин Хүсэлээ нуугдсан хүмүүсийг олохоор болжээ. Үжинг шкафанд нуулаа би өөрөө 00-ийн өрөөнд орлоо. Хүсэлээ намайг хурдан оллоо. Үжингийн байсан шкафыг харин онгойлготол 2цагаан хөл ил харагдаж байсан болохоор Хүсэлээ: "Энэ байна өө" гээд оллоо. Харин Үжин өөрийг нь олох ёсгүй байсан гээд уураллаа. Тэгэхээр нь за аав нь чамайг олъё гээд худлаагаасаа олохгүй байгаа мэт дүр эсгэлээ. Том өрөөгөөр баахан явлаа. "Чи хаана байнаа, олдохгүй байна шүү, заза бууж өгье дөө, бууж өгсөөн гараад ирээрэй" гээд 10-аад удаа  хэллээ. Харин тэр чимээ ч гаргасангүй. Харин яг энэ үед Хүсэлээ: "Ааваа та дүүг маань шкафнаас авраач дээ" гэлээ. Шкафны хаалгыг онгойлгоод арай гэж л түүнийг тэндээс салгалаа. Ховхрохгүй шүү. За тэгээд бид 3 үргэлжлүүлээд нүдээ боож тоголохоор боллоо. 

         Эрт урьдын цагт аав хүү охин 3 нүдээ боож тоголохоор болж гэнээ....

Өнө-Үжингийн хөгжилтэй явдлуудаас-003

Бид 4 нэгэн өдөр хүнсээ хамтдаа цуглуулахаар шийдээд Хархиорин зах руу маинтайгаа явцгаалаа. Гэтэл хархорин зах руу ордог хаалган дээр бөөн түгжрэл болоод ядаж байхад 2 машин нэгнийхээ хажуугаар гарах гээд жихдэлцэж байлаа. Машин чинь хоорондоо наалдлаа Хүрлээ Хүрлээ Хүрлээ шдээ гэж анхаарууллаа. Гэтэл Үжин:

-Ааваа Хүрлээ гэдэг чинь танай найз билүү айн? гэдэг байгаа Ха Ха

SIMPLE MORNING of US

        Өнөө өглөө бид 3 бослоо, Ээж нь ажилдаа явлаа. Үжин өглөөний цай уумаар байна гэлээ. Гадаа дэлгүүрүүд бүгд хаалттай тул түүхий сүү авлаа. Өглөөний цай уух боломжгүй учираас өндөг шарж идээд бид 3 цэцэрлэгтээ явлаа. Үжин тараг уулаа. Пуужин Баяраагийн Бор арьст гаампыг интэрнэтээс үзлээ. Замдаа дэлгүүр орж гоё юм авахуулъя л гэлээ. Үгүй ээ гэлээ. Цэцэрлэгтээ өөр ангид явдаг учираас өнөөдөр хэнийг түрүүлж оруулах талаар улавчаа өмсөх зуур ярилцаж байтал Хүсэлийн ангийн хүүхэд гаднаас орж ирээд цаадахыг чинь хөөргөөд хаячихлаа. Хүсэлээгээ ангид нь оруулж өгчөөд Үжингийн анги руу явж байх зуураа цүнхээ гэртээ мартсаныг тэр гэнэт саналаа. Та миний цүнхийг аваад ир гээд уйлангаа алдлаа. Халаасаа ухаж ухаж нэг бохь гаргаад аавынхаа бохийг авчих гэлээ. Надад халаас байхгүй юм чинь би цүнхэндээ л хийнэ дээ. Та миний цүнхийг авчраад өг гэлээ. Ажилаасаа хоцрох маягтай байсан учираас миний хөөрхөн охин Куртканыхаа халаасанд хийчих гэж хэлээд арай гэж л саллаа даа.

УНГАС-МУНГАС

        Бид 4 нэг өдөр гэртээ нозоороод сууцгааж байлаа. Гэнэт Хамарууд нь үнэр мэдрээд Па Пү хэн унгав болоод л явчихлаа. "Хэн түрүүлж дугарсан хөхөөний ам хөлдөнө" тэгэхээр чи УНГАСАН байна даа гээд л нэгнийгээ хэлнэ. Өнө-Хүсэл мах нээх идээд байдаггүй тэр өдөр мах идсэн байх нь. Инээчихгээд л инээдээ барьж ядаад л түнтийсэн юм сууж байна. "Аанхаа яг чи УНГАСАН байна даа" гээд л хаширыг маш хурдан олчихож байгаа юм. Ээж нь Пү Па гээд л.. Та нар болиочээ гээд л. Бөөн инээдэм болно.

       Яагаад ч юм дуу шуутай унгас гаргахаар хүү маань учиргүй их инээхийг нь яана. Хааяадаа дуутай УНГАС аваад л хаячихна шүү. Тэр үед инээдээ барьж ядан инээнэ хаха гээд л, Ааваа та чинь одоо яаж байнаа? гээд л инээнэ, эмэгтэй хүүхэд харин өөр, Паах ямар заваан юм бэ гээд л...

       Тээр нэг жил 2 хүхэд эхнэр маань ч сураггүй байсан, аав ээжтэйгээ хамт амьдардаг жаахан байсан үе л дээ. Пали дүү маань 2,3-р анги л байсан байх. Аав тэр 2 татаж унаталаа инээж байнаа, Ёо Ёо элэг элэг гээд л гэдэсээ бариад л хөхрөлдөж байлаа. Өрөө рүү нь яаваад ортол аав маань түрсиктэйгээ зогсож байлаа. Пали бүүр татаж унаж байлаа ХАХА гээд л... Харин аав нь сая унгасан чинь турсикээ урагдтал нь унгачихлаа гээд л бөгсөө харуултал хошного хавиараа турсик нь зад явсан байлаа. Бид 3 ч бараг цаг шахуу инээсэн байхаа. Ёоо энийг бичиж байхдаа би яг одоо инээгээд сууж байна. Тэр үед дүү бид 2 аавыг ямар хүчтэй унгаваа арай ч дээ ийм юм гэж бас байдаг юм байхдаа гэж бодоод тэрүүхэн үедээ итгэсэн байсан. Ёстой нэг хагарталаа инээнэ гэдэг чинь болсон доо. Дүү маань бүүр дахин дахин яриад л инээгээд байсан сан. 

         Харин аав суух гэж байгаад түрсикээ урсаныг УНГАСАН болгож дүүг инээлгэснийг сэмхэн надад хэлж бид 2 бас л хагарталаа инээж билээ. Ёоо ХАХА ХАХА

        Унгас гэснээс бас нэг хөгтэй явдал санаанд орлоо. Зуныхаа амралтаар байнга хөдөө өвөө эмээ 2 дээрээ очдог байсан үе л дээ. (10н жилийн бага ангид байхдаа) Өвөө эмээгийн маань ач зээ нар тэнд нэг цуглана даа. Бөөн хөгтэй явдлуудар дүүрэн байдаг сайхан үе байлаа. Манай ээжийн ах нь Лхагва ах эхнэр Туул 2 хүүхдийн хамт хөдөө ирээд л наймаа хийнэ гээд яриад л. Өвөө маань за хүүхдүүд минь гарч ахдаа тусал. Хонины хашаанаас явж хонины УНГАС түүгээдэх шоколад өгнө гэж байна гарцгаа гээл хэллээ. Туул эгч "20кг нь 1 ширхэг SNIKERS шоколад шүү" гээд л. Цоомоо ах, Баяраа бид гурав ч ухас хийн гараад л авлаа. 

         Тухайн үед хэн нь тэгж асуусаныг яг одоо санахгүй байгаа болохоор Лхагва ахын охин Мөнхнарангаар орлуулчихъя. Цоомоо ахаа хашаанд хонинууд байхгүй байхад яаж УНГАСыг нь түүдэг юм бэ, бас УНГАС-ыг нь ямар саванд хийх вэ, тэр хонины УНГАС-аар яг юу хийдэг юм бэ, Муухай үнэртэй байхдаа? гээд л бас л татаж унаталаа инээлгээд Цоомоо ах Баяраа бид 3-ыг 3-н насаар залуужуулсан байхаа. ХАХА 

Өнө-Үжингийн хөгжилтэй явдлуудаас-002

Аав охин 2 агаагаа Телевиз үзэж байх үеэр хамтдаа суниаж байлаа. Хэд суниасны дараа охин ааваасаа асууж гэнэ:

Ааваа таны цэнэг чинь хэр их байна даа минийх бараг дуусах гэж байна шүү!

гэж анхаарууллаа. ХаХа

Өнө-Үжингийн хөгжилтэй явдлуудаас-001

Намайг усанд орж байхад Өнө-Үжин:
-Ааваа та тамайг жаахаан байхад энэ угаалтууран дотор оруулдаг байсан тэ? гээд угаалтуур луу заалаа. Аав нь:
Хэхэ чи тэр жаахан байх үеээ тэгээд санаж байгаа юм уу хө гэхэд:

-Санаж байнаа, тэгээд би ийм жаахан байсан болохоороо ийн ийн гээд уйлдаг байсан шдэ. Гэж 2 алгаа хотойлгоод ирмэгээр нь нийлүүлээд надад үзүүллээ. (ёоо элэг аваад хаячих юмаа, гүйлгээ ухаантай гэдэгийг яаанаа, жаахан байсан нь ойлглмжтой, ийн гээд уйллдаг байсан нь ч бүүр ойлгомжтой шдэ гэж аав нь дотроо бодлоо)

-Тиймээ миний охин чинь жаахаан байсан шдэ гэж хэлэхэд:
-Ааваа та харин хэзээ жаахан байсан юм бэ?
-Аав нь 28 жилийн өмнө жаахан байсан шүү дээ гэхэд охин:
-Ааваа тийм үү би таныг жаахан байхыг харах байсан шдэ, хмммм гэж хэлээд аавыгаа сандраалаа.

Энэ үед Охин маань 4 настай байлаа..

ӨНӨХҮСЭЛ

1. НЭР: ӨНӨХҮСЭЛ
2. НАС: 4
3. ДУРТАЙ ХООЛ: СҮҮТЭЙ БУДАА, ХҮҮХДИЙН КАША
4. ГҮЗЭЭЛЗГЭНЭТЭЙ УС УУХ ДУРТАЙ (гэнээ хаха)
5. ТОГОЛООМООР ТОГОЛОХ ДУРТАЙ, LEGO, БУУ, ЗООМБИЙ, IPAD
6. ДУРТАЙ ӨНГӨ: ШАР ӨНГӨНД ДУРАЙ БАС БОР
7. ТОМ БОЛООД ЦАГДАА БОЛНО
8. ТОМ БОЛООД УРАЛДААНЫ МАШИН УНАНА
9. ХАЙРТАЙ ХҮМҮҮС: ААВ, ЭЭЖ, ӨВӨӨ, ЭМЭЭ, ОГОО, ПААЛИЙ, ӨНӨ-ҮЖИН, ШАГАЙ
10. ЖООХОН ДҮҮТЭЙ БОЛОХЫГ ХҮСЭЖ БАЙНА.